HEY! now the day dawis; 
The jolly cock crawis; 
Now shroudis the shawis 
   Thro' Nature anon. 
The thissel-cock cryis 
On lovers wha lyis: 
Now skaillis the skyis; 
   The nicht is neir gone. 

The fieldis ouerflowis 
With gowans that growis, 
Quhair lilies like low is 
   As red as the rone. 
The turtle that true is, 
With notes that renewis, 
Her pairty pursuis: 
   The nicht is neir gone. 

Now hairtis with hindis 
Conform to their kindis, 
Hie tursis their tyndis 
   On ground quhair they grone. 
Now hurchonis, with hairis, 
Aye passis in pairis; 
Quhilk duly declaris 
   The nicht is neir gone. 

The season excellis 
Through sweetness that smellis; 
Now Cupid compellis 
   Our hairtis echone 
On Venus wha waikis, 
To muse on our maikis, 
Syne sing for their saikis-- 
   'The nicht is neir gone!' 

All courageous knichtis 
Aganis the day dichtis 
The breist-plate that bright is 
   To fight with their fone. 
The stoned steed stampis 
Through courage, and crampis, 
Syne on the land lampis: 
   The nicht is neir gone. 

The freikis on feildis 
That wight wapins weildis 
With shyning bright shieldis 
   At Titan in trone; 
Stiff speiris in reistis 
Ouer corseris crestis 
Are broke on their breistis: 
   The nicht is neir gone. 

So hard are their hittis, 
Some sweyis, some sittis, 
And some perforce flittis 
   On ground quhile they grone. 
Syne groomis that gay is 
On blonkis that brayis 
With swordis assayis:-- 
   The nicht is neir gone.